Vaṭhuampui RD block siam loh vangin Páng mipui rilru a ná - PZP

Pang Zirlai Pawl (PZP) General Headquarters chuan thuchhuah siamin, Mizoram sorkara Council of Ministers ṭhukhawmin Rural Development (RD) block siam thar a remtih zingah Vaṭhuampui a tel ve loh avangin Páng mipui rilru a nat thu an tarlang.

PZP chuan, March 25, 2022-a Council of Ministers ṭhukhawmin Tlabung leh Kawrtethawveng RD block siam thar an remti tih tarlangin, “Vaṭhuampui RD block dah tumna an neih ve loh thu kan hriatin Vaṭhuampui area-a chêng hnam hrang hrangte leh Páng hnam angin kan rilru a na hle a ni,” an ti.

PZP Gen.Hqrs hruaitute’n March 25, 2022 zanah RD minister Lalruatkima an hmu nghal a, Vaṭhuampui RD block siam a ni ve lo chu pawi an tih thu an hrilh tih sawiin PZP chuan, “Population base (mihring awm zat)-a RD block dah a nih dawn chuan Vaṭhuampui area hi a tling ngai dawn lo a, micro-minority Páng leh Bâwm area ang zawnga special treatment pe turin kan ngen a ni,” an ti a; Longpuighat-a APO office rûn tumna awm mek chu ti lo tura an ngen thu leh runluih a nih chuan hnam inkarah buaina a awm tur thu an sawi.

PZP chuan, kum 1966-1986 inkara MNF rammut laiin Páng mite zingah thi an tam thu leh Vaṭhuampui chu khaw bila nunna chán tamna ber khua a ni hiala an rin thu an sawi a; MNF sorkar chu Vaṭhuampui khua leh Páng mipuite ngaihsak tura an phût thu sawiin, “Hetiang renga Mizoram sorkar hian Páng fate thliar hranna a nei zel a nih chuan Mizoram state nuam leh zalen ber hi ram buai takah a chhuah kan hlau hle a ni,” an ti.

Hetih lai hian, Kawrtethawveng Development Committee chuan thuchhuah siamin, Council of Ministers-in Kawrtethawveng RD block siam a remti chu lawmawm an tih thu an tarlang thung.