Ni 97 hnua hripui vei hmuh tlem ber ní Ni 334 hnua active case tlem ber ni a thleng

March 27, Pathianni khan Mizoramah Covid-19 vei mi 63 hmuh chhuah a ni a, ni 97 hnua hmuh chhuah tlem ber ní a ni. Nimin khan hripui vei dam tawh mi 302 chhuahtir an ni a, Covid-19 vei thi an awm lo.

Nimin tlai dar 5 dinhmun angin Mizoramah Covid-19 vei enkawl mek (active case) 917 chiah an awm a, ni 334 hnu, April 28, 2021 hnua active case a tlem ber ṭum a nih bakah, active case 1,000 aia tlem a nih lehna hmasa ber a ni. Nikum April 27 khan active case 767 an awm a, April 28-ah active case 936 an awm a ni.

Covid-19 vei Pathiannia hmuh tharte chu mipa 25 leh hmeichhia 38 an ni a; Rapid Antigen Test hmanga hmuh chhuah vek niin, positivity rate 14.13% a ni. RT-PCR laboratory, TrueNAT leh FIA hmangin swab sample endik a ni lo.

March 27-a Covid-19 positive hmuh zat 63 hi ni 97 hnua hmuh chhuah tlem ber ṭum a ni a, ni 97 kal ta December 19, 2021 khan mi 33 hmuh chhuah a ni.

Positive hmuh thar mi 63 zinga a zatve aia tam, mi 36 chu Saitual district-a mite an ni a, mi 26 (41.27%) chu Khawlian khuaa mite an ni. Siaha, Champhai, Serchhip, Khawzawl leh Hnahthial district-ahte sample endik a nih loh avangin positive hmuh chhuah a ni lo.

IDSP record angin, Mizoramah Covid-19 vei 2,23,856 hmuh chhuah a ni tawh a, mipa 1,04,370 leh hmeichhia 1,19,486 an ni a, mipa aiin hmeichhia 15,116-in an tam zawk. Nimin tlai dar 5 thleng khan mi 2,22,258 (99.29%) chhuahtir an ni tawh a, mi 681 (0.30%) thi tawhin, enkawl mek mi 917 (0.41%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,23,856 chu mi 1,000 zelah hripui vei mi 204 an awm ang a ni a; mi 1,00,000 zela Covid-19 vangin mi 62 an thi tawh ang a ni tih sorkar thuchhuakin a tarlang.