ZPM-in Mizoram electoral roll aṭanga Tripura Bru-te paih turin ECI an ngen
Tripura-a inbéngbel tawh Bru-te Mizoram electoral roll aṭanga paih an nih theih nan ZPM party chuan nimin khan Election Commission of India (ECI) hnenah ngenna an thlen.
Lehkha hi ZPM president Lalliansawta hmingin thehluh a ni a; Mizoram Chief Electoral Officer (CEO) a awm loh avangin Joint CEO kaltlangin ECI-ah an thlen a ni. Joint CEO David Liansanglura Pachuau hnenah hian ZPM general secretary F Lalngheta'n a thehlut a ni.
F Lalngheta chuan, January 16, 2020-a Tripura sorkar leh Mizoram sorkar bakah, Bru páwl hrang hrangte nena Union Home Minister kaihhruainaa inremna an siamah, Tripura-a la awm mek Bru-te chu Tripura-a awm hlen tura tih an nih thu a sawi a, "Tripura-a khawsa zui ta Tuikukte Mizoram electoral roll aṭangin tun thlengin paih a la ni lo a, paih thuai a nih theih nan ECI-ah kan thlen a ni," a ti.
ZPM-in lehkhaa an tarlante
1. Mizorama awm ṭhin Bru-te hi anmahni duh thu ngeia kum 1998-a Mizoram chhuahsana Tripura-a inbéngbel ta an ni a, an chhuah aṭanga kum 22-na thlengin Mizoram electoral roll-ah an la awm.
2. Bru-te hi Mizoram sorkar leh civil society (NGO)-te'n Mizorama lâk let tumin vawi tam tak an bei tawh a, chhungkaw eng emaw zat chu rawn lêtin Mizoramah an inbéngbel tawh. A tam zawk erawh chu chhuanlam chi hrang hrang siamin Mizoramah an rawn kîr duh lo a, Tripura-ah an awm zui zel a ni.
3. January 16, 2020 khan sorkar laipui, Tripura sorkar, Mizoram sorkar leh Bru aiawhte inremna thuthlung an siam a, Tripura-a la awm mek Bru-te chu Tripura-a awm hlen tura tih an ni. Hei hi Bru aiawhte pawhin an pawm.
4. Tunah hian Mizoram electoral roll ennawn mek a ni a, Bru chungchanga January 16, 2020-a inremna angin Mizorama rawn kîr duh lo leh Tripura-a awm zui ta Bru-te hi ZPM party chuan Mizoram electoral roll aṭanga paih turin kan ngen a ni.