Kawlphetha hman man April 2022 aṭangin 6.78%-in a pung dawn
Joint Electricity Regulatory Commission (JERC) for Manipur & Mizoram chuan sorkar kum thar inṭan hun, April 2022 aṭangin Mizorama kawlphetha hman man a tipung dawn a, a punna chu 6.78% a ni. Power tarrif thar ang hian April 1, 2022 aṭangin electric bill chhût tur a ni a, kum 2022-23 chhung hman tur a ni.
Mizoram sorkar chuan JERC-ah hian kum 2022-23 chhung atana kawlphetha hman man tihpun a rawt a, power tariff thar tura sorkarin a rawt chu kum 2021-22 chhunga tariff aṭangin 21.05%-in a pung.
Mizoram sorkarin kawlphetha hman man tihsan a rawtna hi political party ṭhenkhatin an dodal a, an duh lohna chhante JERC-ah an thlen. JERC chuan public hearing a ko a, political party-te’n power tariff tihsan an duh loh chhante an sawi a, Power & Electricity department lamin tihpun a ṭul chhante an sawi thung.
Dodalnate leh Mizoram sorkarin kawlphetha hman man tihsan a duh chhante a zirchian hnuah JERC chuan kawlphetha hman man chu 6.78%-a tihpun turin thutlukna a siam a; kawlphetha unit khat man Rs. 7.79 a ni tawh dawn a, kum 2021-22 chhunga tariff hman chu unit khatah Rs. 6.71 a ni.
JERC tarlan danin, kum 2022-23 chhungin Mizoram pumah consumer 2,92,087 awm tura chhût a ni a, chu'ng zinga 2,67,272 chu domestic consumer an ni.
Tuna kawlphetha hman dan ang chuan, domestic consumer 2,67,272 zinga 1,34,077 chuan thla khat chhungin power unit 70 vel an hmang tura chhût a ni a, unit 110 vel hmang chhungkua (consumer) 71,987 leh unit 200 aia tam hmang consumer 39,362 awm tura chhût a ni. Kutir Jyoti consumer chhungkua 21,818 leh high tension domestic consumer 28 awm tura chhût a ni bawk.