VL Nghaka Padma Shri hlan a ni

VL Nghaka (92) h/o Lalbiakveli (L), Ramhlun South chuan Mizorama Hindi zirna leh tihhmasawnna lama a thawh ṭhat avangin 'Literature and Education' huangah nimin khan Rashtrapati Bhavan-ah president Ram Nath Kovind hnen aṭangin Padma Shri a dawng.

VL Nghaka hi kum 1930-ah a piang a, tunah hian Ramhlun Presbyterian Kohhranah upa a ni mek.

Kum 1954-ah Hindi Visharad zoin, Mizo zinga zo hmasa a ni a, kum 1976-ah M.A leh kum 1980-ah M.Ed. a zo leh bawk. School Education department-ah hun rei tak hna hrang hrang a thawk a, DIET, Aizawl principal a nih laiin kum 1991 khan sorkar hna aṭangin a châwl a ni.

Kum 1954 khan Kawnpuiah Assam Hindi Prachar Samiti a din a, president hmasa ber a nih bakah, hun rei tak chhung president a ni a; AHPS hi Mizoram Hindi Prachar Sabha tih a nih hnuah pawh hun rei tak hotu ber a ni zui a, tunah hian adviser a ni mek.

VL Nghaka hian rambuai laiin kum 1966-1976 inkarah India sipaite leh MNF inkara ṭawng lettuah a ṭang ṭhin a; lehkhabu eng emaw zat ziak tawhin, chu'ng zingah chuan Hindi Grammer leh Hindi-Mizo Dictionary pawh a tel a ni.