Robert Romawia'n sorkar laipui a dàwr

New Delhi-a chám mek minister of state Robert Romawia Royte chuan nimin khan sorkar laipui hotu hrang hrang a kâwm a, a department chan hnuaia hmalakna turte a sawipui.

Sports minister Robert Romawia Royte hian Union minister of state for Steel Faggan Singh Kulaste a kawmnaah, Steel Ministry aṭanga sport infrastructure siam Mizoram sorkarin rawtna a neihte a sawipui a; Union Minister chuan theihtawp chhuahpui a tum thu a lo hrilh.

DoNER secretary Lok Ranjan a kawmnaah Robert Romawia chuan, DoNER hnuaia NESIDS guidelines-in sports infrastructure a huam lo chu sorkar laipui tihsual lian tak a nih thu a sawi a, guidelines chu siamṭhat vat a rawt.

Robert Romawia hian Union Finance secretary TV Somanathan pawh kàwmin, Mizoram chu a bika puih tlak a nihna hre reng turin a ngen. TV Somanathan chuan, Finance Ministry-in Central Special Assistance to States for Capital Expenditure sum a pek tur chu chak taka Mizoramin a hman theih chuan pek belh theih a nih thu a sawi.

NITI Aayog hotute hnenah Robert Romawia chuan sports leh tourism tihhmasawnna tur project an kuta awm lai mekte tifel rang turin a ngen a; NITI Aayog hotute chuan tihbelh ngai laite sawiin, Mizoramin a tihbelh veleh an pawmpui mai tawh tur thu an lo hrilh a ni.