COVID-19: Mizoram dinhmun Hripui vei 13 hmuh belh a ni

November 22, Pathianni khan Mizoram­ah Covid-19 vei mi 13 hmuh chhuah a ni a, an zingah natna (Covid-19 symptom) lang chhuak pahnih an awm. Nimin khan hripui laka fihlîm tawh mi 11 chhuahtir an ni thung.

Covid-19 vei hmuh thar 13-te chu mipa 12 leh hmeichhia pakhat an ni a, TrueNAT-PCR hmanga hmuh mi 11 leh Rapid Antigen Test (RAT) hmanga hmuh mi pahnih an ni. ZMC laboratory-ah erawh swab sample endik a ni lo. Pathianni khan TrueNAT-PCR hmangin district pangaah mi 143 leh RAT hmangin district parukah mi 171 endik an ni.

TrueNAT-PCR hmanga hmuh zinga 10 chu Civil Hospital, Lungleia hmuh niin, mipa kum 30-55 inkar an ni a, 2nd Bn MAP mi leh sa, Bihar inthlana duty zo rawn hawte an ni. Serchhip District Hospital-ah Thenzawla BSF sipai kum 49 mi, Bihar inthlana duty zo rawn haw hmuh chhuah a ni bawk. Mi 11-te zingah symptom nei an awm lo.

RAT hmangin Aizawl­ah mi pahnih hmuh chhuah a ni a; Ramhlun Vengthara hmeichhia kum 16 mi leh Chaltlanga mipa kum 36 mi an ni. An pahnih hian tualchhunga kai, symptom nei ve ve an ni.

Nimin khan hripui laka fihlîm tawh mi 11 chhuahtir an ni a; SRH-ZMC aṭangin mi pahnih, Tribal Art Centre aṭangin panga, Kolasib SIRD aṭangin pathum leh Lunglei Pukpui CCC aṭangin mi pakhat an chhuak. Pathiannia chhuak, Vanglaini-in nimina kan tarlan hman loh mi 22 an awm a, Pathiannia chhuak zawng zawng chu mi 35 an ni.

Mizoramah Covid-19 positive mi 3,660 hmuh chhuah a ni tawh a, mipa 2,722 leh hmeichhia 938 an ni. Nimin tlai dar 5 thleng khan mi 3,203 (87.51%) chhuahtir an ni tawh a, mi panga (0.14%) thi tawhin, enkawl mek mi 452 (12.35%) an awm.

Covid-19 positive hmuh tawh mi 3,660 zinga mi 1,680 chu Mizoram chhunga kái an ni a, mi 1,980 chu state páwn aṭanga rawn lût an ni.