SEDP hnuaia zirtirtu lâk dan Central YMA-in a ngaimawh

YMA, Central Executive Committee (CEC) member-te March 28, Thawhṭanni tlaia ṭhu­khawm chuan, SEDP hnuaia Mizoram sorkarin zirtirtu a lâk dan ngaimawhin, en zui an rél a; Mizoram hmun hrang hranga hnam dang awm zingah inner line permit (ILP) endik an rél bawk.

YMA CEC ṭhukhawm hi presi­dent R Lalngheta'n a kaihruai a; Mizoram hmun hrang hranga hnam dang awmte zinga ILP endik an rel chu April 12, 2022 ral hmain kalpui turin an ruahman a ni.

Socio Economic Development Programme (SEDP) hnuaia zirtir­tu lâk dan en zui an rel chungchanga zawhna chhangin CYMA general secretary Prof. Lalnuntluanga chuan, "SEDP hnuaia zirtirtu lâk danah dan loa thil tih a awma sawi a ni ṭhin a, sorkarin la loin, party mite'n an la ṭhina sawi a tam a, hei hi kan duh loh a ni. Zirtirtu an la a nih chuan party-in la loin, a latu tur dik tak sorkarin dan angin la se kan duh," a ti.

Central YMA rorel leh an duh dan chu nimin khan School Educa­tion minister Lalchhandama Ralte hnenah an thlen nghal a ni.

CYMA chuan, kuhva rah sum­dawnna chungchangah hmalak zui zel dan tur an ruahman a; hemi chungchangah hian CYMA General Secretary chuan, tun dinhmunah chuan Myanmar aṭanga dan loa kuhva rah lâk luh chu a tàwp riha an hriat thu leh Mizorama kudam hrang hrangah kuhva rah lak luh sa tangkhang tam tak a awm thu a sawi.

Prof. Lalnuntluanga chuan, "Kuhva rah lâk luh sa tam tak Mizoram chhunga kudam hrang hranga tangkhang a la awm a, chu'ngte chu tihral a nih theih nan a neitute'n CYMA an rawn dàwr ṭhin. Dan loa lak luhte a ni a, CYMA hnuaia kuhva raha sumdawnna zir chiangtu study team-te nen hmalak zel dan tur la zir chian a ni ang," a ti.

Central YMA ṭhukhawm chuan, kum 2022-23 chhungin cricket leh volleyball-ah YMA branch-te inelna buatsaih te, kum 2022-23 chhungin YMA Zaipawl din te, CYMA Disaster Response Team din thar lehte an rél bawk.