MNF sorkarah Abub leh Kamrul-a'n a hmawr tê pawh an khawih pha lo - MNF President

Tlabung tlawh tura zin chief minister Zoramthanga, MNF president chuan nimin khan Lungleia Mizo Hnam Rûn a tlawh a, amah lo hmuaktu an party hmaah thu sawiin, MNF sorkarah Abub Majumdar leh Kamrul Chhangte ten a hmawr tê pawh an khawih phâk lo niin a sawi.

MNF President chuan, MNF thlipui a tleh mek nia sawiin, "Opposition lam hian min sawichhiatna tur an hre lo lutuk a, min sawisel hrâm an duh avangin keini pawhin kan hriat mang loh, Congress sorkar hun aṭanga an contractor leh supplier Abub leh Kamrul-a tih vel mai maiin min bei. He mite pahnih hian kan sorkarah hian a hmawr tê pawh an khawih phâk lo. Heng mai mai bak hi min sawina tur an hre lo," a ti.

SEDP an sem dawn thu sawiin Zoramthanga chuan, "SEDP an sem thei lo ang min ti a, kan sem dawn si a, kan sem tak tak ang tih an hlau leh a ni. Nuai thum an intiam a, nuai thumin sem an tum lo, min ti leh a, vawi khatah nuai thum kan pe nghal ang kan ti rêng rêng lo. Tunah hian a thawh khat nan sing ngain kan pe dawn a, thawh hnihna, thawh thumna a awm zel dawn," a ti a; a ṭul chuan nuai thum aia tam pawh an sem tur thu a sawi.