Assam police awp Mizoram lâk lêt tum State pahnih inbiak tumna a la awm lo

Aitlang, Buarchep leh Saiha­pui-V rama Assam police awmna hmunte chu Mizoram sorkarin tharum thawh loa inbiakna hmanga lâk lêt a tum a; hemi chungchangah hian Mizoram sorkar aṭanga Assam sorkar biak tumna a la awm rih lo thung.

Vanglaini palai zawhna chhangin Home minister Lalchamliana chuan, Aitlang, Buarchep leh Saihapui-V rama Assam police hmun luahte chu lâk lêt tum a nih thu a sawi a, "Inbiakna hmanga chinfel tum a ni a, tharum hi chu a chinfelna tluan tling a ni lo," a ti a; Mizoram sorkarin inbiakna nei tura Assam sorkar a dàwr leh dàwr loh zawhna chhangin Home Minister chuan, "Tunah hi chuan kan neih ka hre rih lo," a ti.

Lalchamliana chuan, Mizoram leh Assam ramri chungchang buaina chinfel dan tur zir chiang turin The Manohar Parrikar Institute for Defence Studies and Analyses (MP-IDSA)-te kal an tum thu sawiin, "Tun thlengin an la rawn kal lo a, ṭum hnih an ṭhulh tawh," a ti a; Mizoram sorkar chu Assam nena ramri chungchanga inbe turin a inpeih tawh tih a sawi.

Home Minister chuan, "De­pu­ty Chief Minister kaihhruai Boundary Committee chuan MP-IDSA lo kal huna lo sawi tur leh ramri chungchang inbiakna neih hun pawha kan ṭanhmun turte an siam fel tawh," a ti a; Mizoram sorkarin Assam sorkar biak tumna a la neih rih loh thu te, Mizoram sorkar dinna tur chu BEFR 1875 a nih thu te, inbiak rem theih dan tur chu give & take hmangin a nih an rin thute a sawi bawk.