KHAWTHLIR

Grade A hmu
National Assessment and Accreditation Council (NAAC) chuan Zirtiri Residential Science College chu grade A (CGPA 3.09) a pe. Zirtiri RSC hi NAAC Peer Team chuan March 22-23, 2022 chhung khan an enfiah a, an enfiah ṭum thumna a ni. College hi an hmun thar, Durtlang Leitanah an insawn tawh a, an hmun hlui Ramthar Vengah Computer Science a la awm rih thung.

Kawlkulhah in kâng
March 28, Thawhlehni zan dar 9 vel khan Kawlkulh khuaa C Laldanga in, Assam type, chhungkaw pahnih luah lai chu a kâng. Kangmei tuarte hi nimin khan Khawzawl bawrhsap CC Lalchhuangkima chuan State Disaster Response Fund aṭangin ṭanpuina Rs 1,05,700 leh silpaulin pahnih a pe.

Vawk 323 thi tawh
Vawk pûl hri, African Swine Fever (ASF) avangin Mizoramah February 2, 2022 aṭanga nimin thleng khan khaw 21-ah vawk 323 a thi tawh a, vawk 18 suat a ni tawh bawk. Vawk thite chu Aizawl, Lunglei, Champhai, Kolasib leh Saitual district-a mite a ni.

Thisen pe
Govt. Aizawl College NSS leh Red Ribbon Club chuan nimin khan an college-ah blood donation camp an huaihawt a, Civil Hospital, Aizawl tan thisen unit 166 an pe a, petute mipa 140 leh hmeichhia 26 an ni.

High school-te Ṭanpuina pek rêl
Sialkal Range Development Council (SRDC) Council chu an chairman L Thangmawia, MLA kaihhruaiin nimin khan an ṭhukhawm a; Vaikhawtlang leh Hrianghmun high school-te mamawh zualpui phuhrûk nan grant-in-aid aṭangin Rs 1,00,000 ve ve pek an rel. Ṭhutkhawmah hian zirlai rethei, an zirnaa hlawhtlinna nei tura ṭanpuina pek ngaite ṭanpui dan tur leh mimal thiamna bik neite thiamna tipung tura puih dan tur pawh sawiho a ni.