RS MP Vena'n Tipaimukh thlenga lawng kal theiha Tuiruang lui siam turin a ngen

Mizoram Rajya Sabha MP K Vanlalvena chuan, Tuiruang luiah Mizoram leh Manipur inrìna thlenga lawng kawng siam turin sorkar laipuia Ministry of Ports, Shipping and Waterways a ngen.

K Vanlalvena hian March 25, 2022 khan Parliament-ah thu sawiin, Assam, Mizoram leh Manipur-a tláng mi, Barak lui kama chengte ei leh bar zawnna tihhmasawnna tur ngaih pawimawh a ṭul thu a sawi a; Tuiruang lui hmangin Bay of Bengal aṭangin lawng hmangin Tipaimukh thlen theih a nih thu sawiin, Barak luia National Waterways no. 6 chu tihthui belhin, Tuiruang luiah Tipaimukh thlenga lawng kawng siam turin sorkar laipui a ngen a ni.

K Vanlalvena chuan, Assam state chhung Bhanga aṭanga Bangladesh ram hrûla paltlanga Lakhipur pawhtu km. 121-a thui tui kawng chu Assam bakah Manipur leh Mizoram ten an chhawr theih dan tur a sawi a; Barak lui hnar lamah Lakhipur aṭangin Tuiruang lui hmangin km. 100 vela hláa awm, Tuiruang leh Tuivai infinna Tipaimukh thlengin lawnga kal theih a nih tur thu a sawi bawk.

Tui kawng chungchangah hian Mizoram sorkara Transport department-in Ministry of Ports, Shipping and Waterways-ah rawtna a thlen tawh thu a sawi a, "Hei hi tihpuitlin a nih chuan Barak lui hrûla chengte'n nasa takin an chhawr thei dawn a ni," tiin Union minister of Ports, Shipping and Waterways minister Sarbananda Sonowal chu hma la turin a ngen a ni.