Mara ADC-in golden jubilee an lawm

Mara Autonomous District Council (MADC) chuan nimin khan MADC office complex-ah an kum 50-na, golden jubilee an lawm a, MADC chief executive member N Zakhai chuan MADC-in kum 50 a tling ta chu ropui a tih thu a sawi.

CEM N Zakhai chuan, Mara ramin ADC a neih theihna tura theihtawp chhuaha hma latu, hruaitu hmasa ṭhenkhat chatuan ram pan tawhte Mara ramin a hre reng tih a sawi a, "Mara ram ropuina hi anni hmalakna rah a ni a, an chungah Mara ram mipui aiawhin lawmthu ka sawi a ni," a ti.

MADC CEM hian golden jubilee lungphun a hawng a, MADC chairman H Sahlo-a'n jubilee flag a tlangzarh a, executive member K Hrahmo-a'n jubilee car flag a tlangzarh thung.

Mara ramin ADC a hmuh theihna atana hma latu hruaitu hmasa pariat zingah - Mylai Hlychho leh S Pailei te an la dam a, MADC golden jubilee lawmnaah hian an tel thei a ni.