CYMA-in Education Minister an kâwm

Central YMA hruaitute chuan nimin khan School Education minister Lalchhandama Ralte a pisaah an kâwm a, zirna kaihhnawih thil chi hrang hrang an sawipui.

CYMA hruaitute hi president R Lalngheta hoin an kal a; zirna sikula subject pakhat, Environmental Studies chu subject pawimawh tak a nih avangin zirtirtute training pek ṭul an tih thu te, zirlaite'n an zirlaibu piah lama kut themthiamna (skill development) an neih theihna turin zirtirna kalpui chungchangte an sawipui a ni.

Minister Lalchhandama Ralte chuan, sikulah a hranpain Environmental Studies zirtirtu bik an awm loh thu leh a remchangin an zirtir mai thu a sawi rualin, Environmental Studies zirtirtute training pek chu a ngaih pawimawh thu leh lo en zui a tum thu a lo hrilh a; zirlaite'n kut themthiamna an neihna tura inzirtir a ṭul thu a sawi.

CYMA hruaitute chuan zirna chungchanga Samagra Shiksha leh Central YMA thawhhona chungchang an sawipui bawk.