Assam-a Zo hnahthlakte'n Mizorama An beh theihna turin hma an la ṭan
MZP hruaitute chuan nimin khan an pisaah MJA member-te léngah an sáwm a, tun hnaia Thangram Indigenous People's Movement (TIPM) hruaitute nena Kanhmuna an inkawm chungchang an sawipui. Assam-a Zo hnahthlak hnam chi hrang pangate'n Mizorama an beh theih nan hma an la mek tih an sawi.
MZP president B Vanlaltana chuan, sq.mile 180 forest reserved chhunga awm Zo hnahthlakte'n Mizorama beh duhin hma an la mek tih sawiin, "Hemi huam chhunga Zo hnahthlakte chuan Thangram Indigenous People's Movement dinin hma an la a ni. Kan inkawm ṭumin Mizo vek an nih thu te, Assam sorkarin an en hran thute leh Mizoram sorkar hnuaiah an awm chuan hma an sawn zawk an inbeisei thute an sawi," a ti.
B Vanlaltána chuan, TIPM hmalakna chu MZP-in an thláwp tlat dawn tih sawiin, "Anni hi an thutak hle a, kan inkawmnaah an hnukte a ulh hial. Enhran an hlawh avangin ná an ti a, kan unaute hi Mizoram lamah an beh ngei theihna atan theihtawp kan chhuahpui dawn," a ti a; Assam-a Zo hnahthlakte'n an Jerusalem (Mizoram) an ngaih ngawih ngawih thu a sawi.
TIPM chungchang hi Chief Minister sawipui an tum thu sawiin MZP President chuan, "Document leh thil pawimawh ṭulte la khawm turin kan ti a, an buaipui mek. Anni chuan tuna an awmna hmunah hian awm hmasa ber an nih thu an sawi a, a hnuah forest reserved-ah puan hnan an ni. Prime Minister leh Union Home Minister-ah pawh thlen kan tum," a ti.
MZP senior adviser F Lalnienga chuan, Assam-a Zo hnahthlakte chu electoral roll-ah pawh an luh hleih theih loh thu sawiin, "Forest reserved-ah puan hnan an ni a, lo neih erawh an phalsak. Sangha dil siam tur pawhin JCB lâk luh phalsak an ni lo. Kum 2012 khan Mamit DC hnenah an district-a awm an duh thu an thlen a, hmalakna a awm lo," a ti a; Mizorama behtir dan zawn vat a ṭul thu a sawi.
TIPM hi Assam awpna hnuaia awm Zo hnahthlak hrang hrang - Hrangkhawl, Chorei, Molsom, Ranglong leh Sakachep inzawmkhawmin an din a ni a; Mizorama an beh theihna atan hma an la mek a, MZP-te puihna an ngen a ni.