Civil Hospital, Aizawla CT Scan hman theih loh chhan sawifiah

Mizoram sorkar chuan thuchhuah siamin, Civil Hospital, Aizawla CT Scan thar hman theih a la nih loh chhan a sawifiah a; khawl thar chu hman theiha peih tumin theihtâwp chhuah reng a ni chungin, kalphung fel taka zawm a ṭul avangin zawh nghal mai theih loh a nih thu leh mipui hriatthiamna an ngen thu a tarlang.

Sorkar thuchhuah tarlan danin, Civil Hospital, Aizawla CT Scan (16 slices) khawl chu kum 2013-ah North Eastern Council aṭanga sum hmuh hmangin bun a ni a, kum riat chhung hman a nih avangin thawm ṭhat a ngai fo a; chuvang chuan kum 2021 khan NESIDS sum hmangin Rs 2,60,00,000 man CT Scan (64 slices) khawl thar lei a ni.

CT Scan khawl thar bun nan Atomic Energy Regulatory Board thupekte zawm turin khawl hlui dahna hmunhma chei ṭhat mek a ni a, peih vat tum a nih thu tarlan a ni.

CT Scan khawl hlui chu June 21, 2021 khan Siaha District Hospital-a dah tura rèl a ni a, siam ngaite chu Siahaa dah hnuah siam tura tih a ni. Siahaa sawn ruala thawm ṭhatna tur senso tura chhût Rs. 81,73,260 leh a khawl hlui tawh tak enkawl zuina (annual maintenance contract) senso tura chhût kum tin cheng nuai 21 a ngaih dawn avangin khawl chu kawl zui loh ṭha zawkin an hria a, chuvang chuan Rs 39,76,000-in hralh a ni.