Sanitary napkin vending machine hawng

Mizoram Samagra Shiksha hmalaknaa Mizo High School, Aizawla sanitary napkin vending machine leh incinerator khawl bunte tharte chu nimin khan School Education minister Lalchhandama Ralte-in a hawng.

Samagra Shiksha deputy state project director VL Malsawma tarlan danin, sanitary pad vending machine hi elementary school 547, secondary school leh higher secondary school 270-ah dah a ni dawn a, district pasarihah khawl phurh thlen a ni tawh.

Adolescence Health and Hygiene programme-ah hian vending machine bakah, tleirawlte tana hriselna leh invawn thianghlimna awareness campaign neih tura ruahman a ni bawk.

Khawl hawngtu Lalchhandama Ralte chuan, khawlte chu hmeichhe naupangte tan a ṭangkai hle dawn tih a sawi a, “Vending machine hi zirlai hmeichhia 25 chin awmna sikulah pek theih a ni a, tunah hian sikul 817-ah bun a ni dawn a, sikul 1,300 velah dah tum a ni,” a ti.

Hawnna inkhawmah hian State Commission for Protection of Child Right chairman Dr Sangzuala leh School Education secretary Dr Lalzirmawia Chhangte ten tleirawlte nuna thil inthlâk danglam tam tak awm ṭhin chungchanga zirtirtu, nu leh pa leh mipui vantlang hriat tur hrang hrang an sawifiah a ni.