MZP leh AMC-in college debate buatsaih

Mizo Zirlai Pawl (MZP) leh Aizawl Municipal Corporation (AMC) chuan nimin khan Chanmari YMA Hall-ah Inter College Debate Competition 2022 an buatsaih a, AMC mayor Lalrinenga Sailo-in a hawng.

Inhnial fiamnaa intihsiakah hian Mizorama college 13 an tel a, Aizawl khawpui chhunga college pakua leh Aizawl khawpui páwn lama college pali an ni a; thupui chu - ‘Aizawl khawpui himna leh thianghlimna atan mipuite’n dan kan zâwm ṭha tâwk a ni,’ tih a ni.

Intihsiakah hian Mizoram Law College zirlai K Vanlalneihpuia chu pakhatna a ni a; Hrangbana College zirlai Beirapatha Khailo leh J Thankima College zirlai Lalparmawii te chu pahnihna leh pathumna an ni.

Debate hawnna inkhawmah Aizawl mayor Lalrinenga Sailo chuan, bawlhhlawh sawngbawl leh tihral danah intodelh turin AMC-in hma a la mek tih sawiin, “Kan bawlhhlawhte hi rangkachaka chantir kan tum a, kan hlawhtling ṭan mek a ni,” a ti.

Lalrinenga Sailo chuan, bawlhhlawh leitu leh hâitu turte chu phalna (license) pek an nih thu sawiin, ni 20 chhungin royalty aṭangin Rs 20,000 a lut thei tih a sawi.

MZP president Lalnunmawia Pautu pawhin thu sawiin, Mizoramin buaina a tawh laia Mizoram mipui tuamhlâwmtu Myanmar ram buaina vanga harsatna tâwk mek Zo hnahthlakte hre reng a, ṭanpui leh tuamhlâwm kawngah theihtawpa hma la turin zirlaite a chah a ni.