National Generic Documentation System hawng

Land Revenue & Settlement (LRS) minister Lalruatkima chuan nimin khan Lunglei Convention Centre-ah huan, lo leh ram kaihhnawih lehkha pawimawhte information technology (IT) hmanga dahṭhatna leh chhinchhiahna tur Computerization of Registration, National Generic Documentation System a hawng.

Hawnna inkhawma tarlan danin, National Generic Documentation System hnuaia Lunglei Sub-Registrar-a thawktu turte chu an mamawh hmanruate chhawp an nih tawh a, training pawh an nei vek tawh. Online document registration ti duh tan igrmizoram.nic.in ah tih theih a ni.

Minister Lalruatkima chuan, tunlai thiamna hmanga lehkha pawimawhte vawn ṭhat a ṭul thu sawiin, “In hmun leh ram sorkara chhinchhiah leh a kaihhnawih thil tinrêngte awlsam zawkin mipuite’n kan ti thei tawh dawn a, in hmun lei leh hralh thu-ah leh document bo thu-ahte he hmalakna hian nasa takin min tiphuisui dawn a ni,” a ti.

Lunglei Municipal Council dinna turah sorkarin theihtawp a chhuah mek tih sawiin Lalruatkima chuan, “Hei hi Lunglei khawpui hmasawn zelna tur leh khawpui ruhrel changtlung zawk kan neih theihna tur a ni,” a ti a, hlawhtling taka kalpui a nih theih nan sorkar finchhuaha thawhpui turin mipui a sáwm.

Hawnna inkhawmah hian HPC vice chairman Lawmawma Tochhawng, LRS director Angela Zothanpuii, Lunglei DC Kulothungan A bakah, sorkar hotute leh pawl hrang hrang aiawhte an tel a ni.