Hna thawh ṭhat vanga fak hlawh MLA nih ka tum ber a ni - Zaithanzama

Aizawl West-III bialtu MLA VL Zaithanzama chuan March 28, Thawhṭanni khan a bial chhunga Khatla leh Mission Vengthlanga MLA fund hmanga hna thawhte a tlawh kual a, thu sawiin, “MLA hna thawk ṭha, hna thawh ṭhat vanga ram leh bial mipui fak hlawh MLA nih hi ka tum ber a ni,” a ti.

VL Zaithanzama chuan, sorkarna chelh tawhte leh Aizawl West-III bialtu MLA lo ni tawhte’n theihtawp chhuaha hma an lak tawhnate lawmawm a tih thu a sawi rualin, “Keini chuan a aia tam leh ropui zawkin kan thawk thei tih lantir kan tum a ni,” a ti a; an hnathawhah duh tâwk lohna leh lawm lohna mipuiin an neih chuan ṭha leh felfai zawka thawh an inhuam reng thu a sawi.

Aizawl West-III MLA chuan, “Ṭawngkam thiam leh sawi mâm thiam vanga ram hi ṭha tur a ni lo a, dik tak leh theihtawp chhuaha kan thawh phawt chuan he ram hian danglamna a nei ngei ngei ang tih hi kan thu rolum a ni. Sum tam tak a hmanna dik si lo ai chuan, kan hmuh chhun ang dik taka thawh hian hmasawnna a thlen zawk a ni,” a ti.