March 28-a Covid-19 positivity rate 11.93%

March 28, Thawhṭanni khan Mizoramah Covid-19 vei mi 248 hmuh chhuah a ni a, positivity rate 11.93% a ni. Nimin khan hripui vei dam tawh mi 218 chhuahtir an ni a, Covid-19 vanga thi an awm lo.

Covid-19 vei hmuh tharte chu mipa 116 leh hmeichhia 132 an ni a; TrueNAT hmanga hmuh panga, RAT hmanga hmuh 241 leh FIA hmanga hmuh pahnih an ni. RT-PCR laboratory-a swab sample endik zingah positive an awm lo.

IDSP record angin, Mizoramah Covid-19 vei 2,24,104 hmuh chhuah a ni tawh a, mipa 1,04,486 leh hmeichhia 1,19,618 an ni a, mipa aiin hmeichhia 15,132-in an tam zawk. Nimin tlai dar 5 thleng khan mi 2,22,476 (99.27%) chhuahtir an ni tawh a, mi 684 (0.31%) thi tawhin, enkawl mek mi 944 (0.42%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,24,104 chu mi 1,000 zelah hripui vei mi 204 an awm ang a ni a; mi 1,00,000 zela Covid-19 vangin mi 62 an thi tawh ang a ni tih sorkar thuchhuakin a tarlang.