MLA inthlanah vote 80.40% a tla ; Mipa aiin hmeichhia vote thlak an tam

November 28, 2018-a Mizoram Legis­lative Assembly inthlanpuia vote tlate chu chhût khawm zel a ni a, Election depart­ment-in vote tla zat a neih hnuhnung berah chuan postal ballot leh service voter tel loa vote tla zat chu 80.40% a ni. Vote thlaktu zingah mipa aiin hmeichhiain an tam zawk.

Tun ṭum inthlanah hian Mizoram pumah vote nei mi 7,70,395 an awm a, postal ballot leh service voter tel loin mi 6,19,405-in vote an thlak. Postal ballot leh service voter vote thlak a la luh belh zel avangin, eng zat nge tla dawn tih a la hriat theih lo. Election department hotute chuan, kum 2013 MLA inthlana vote tla zat 83.41% chu kumina vote tla hian a phak theih an beisei thu an sawi.

Vote tlaktu tamna ber bial chu Tuichawng constituency niin, mi 25,610-in vote an thlak a; vote awm zat aṭanga chhûta vote tlak

ṭhatna ber chu Tuikum bial a ni thung a, voter zinga 87.14%-in vote an thlak a ni. Vote tlak temna ber chu Thorang bial niin, vote 11,346 a tla a; percentage-a vote tlak chhiatna ber chu Lawngtlai East niin, voter zinga 73.47%-in vote an thlak a ni.

Assembly constituency 40 zinga vote awm tamna ber chu Tuichawng bial niin, voter 30,584 an awm a, voter tlemna ber constituency chu Thorang niin, voter 13,174 an awm.

Mizoram electoral roll-ah mipa aiin hmeichhia an tam zawk a, tun ṭum inthlanah pawh vote thlaktu zingah hmeichhia an tam zawk. Vote tla zawng zawng 6,19,405 zinga 2,99,322 chu mipa vote niin, 3,20,083 chu hmeichhe vote a ni a, mipa aia hmeichhe vote thlak tamna hi vote 20,761 a ni.

Kumin inthlana vote tlate hi December 11 hian chhiar a ni dawn a, Aizawl district-a vote tlate chu Aizawl khawpuia hmun panga - R Dengṭhuama Hall, Hrangbana College, Govt. Aizawl College, Pachhung University College leh Assembly Annexe-ahte chhiar a ni ang.

Vanglaini palai zawhna chhangin Election department hotute chuan, chak zawka vote tlate chhiar a nih theihna atan ruahmanna siam an tum thu an sawi a, "Vote chhiarna counter a tlem avangin vote chhiar a chak lo deuh ṭhin a, tun ṭumah chuan a tam thei ang vote chhiarna counter siam tum a ni," an ti.

Aizawla vote chhiarna tur
PUC-ah: Aizawl North-I, Aizawl West-I, Aizawl South-I, Ṭawi, Chalfilh & Tuivawl
GAC-ah: Aizawl South-II & Aizawl South-III
HBC-ah: Aizawl East-I & Aizawl East-II
Assembly Annexe: Aizawl West-II & Aizawl West-III
R Dengṭhuama Hall: Aizawl North-II & Aizawl North-III