Azasora khua-ah Vote thlak ṭha dawn

November 28-a Assembly inthlan neih zawh taka EVM leh VVPAT chiangkuan loh vanga vote thlak zawh theih lohna hmun, Tuichawng constituen­cy-a Azasora khuaah chuan December 4, 2018-ah vote thlak ṭhat a ni dawn.

Tarlan tawh angin, Azasora-ah hian vote 50 vel a tlak hnuah EVM leh VVPAT chiangkuan loh avangin vote thlak zui theih a ni lo. Eng emaw thulha EVM leh VVPAT thlakna tura ruahman hmangin EVM leh VVPAT chiang lo hi thlak tum a ni a, mahse a hman theih loh.

EVM leh VVPAT inrin lâwk hman theih a nih loh avang hian hmun dang aṭangin EVM leh VVPAT lak a ni a, vote thlak theiha peihfel a nih chuan chawhnu dar 2 a ri tawh a ni. Zan dar 12 thleng vote thlak a ni a, hemi hnu lamah hian EVM leh VVPAT hmanzui theih a nih tak loh avangin vote thlak zui theih a ni lo.

Election department hotute chuan Election Commission of India (ECI) hnenah Azasora-a vote thlak ṭhat an dil a, ECI chuan December 4-a vote thlak ṭhat a phalsak. Vote thlak ṭhat a nih dawn avang hian vote thlak tawhte pawhin an thlak ṭhat leh a ngai dawn. Azasora-ah hian vote nei mi 1,080 an awm a, electoral roll aṭanga chhût chuan vote thlak tawhah hian mi 300 chuangin vote an thlak hman lo a ni.