MNF President-in a dina bialah Tlin ngei a inring
MNF president Zoramthanga chuan nimin khan Mizo Hnam Rûna inkhawmah thu sawiin, November 28-a Mizoram inthlanpui neih chu muanawm, fel leh thianghlim thawkhata a ngaih thu leh, a dinna Aizawl East-I bialah a tling ngei a rin thu a sawi a, "Pathianin hun a tihah chuan min sawp hrep a, hun a tihah chuan min tungding ṭhin," a ti.
Zoramthanga chuan, inthlan hun la hla deuh chu ni se, Congress an ṭhiah nasat tur thu sawiin, "Inthlan tuk zing dar 7 thlengin kan inlawm lut a ni. Party dang pakhat, inti-thianghlim ber, inti-kohhran 'base' ber, intifing ber leh intifel ber chuan ṭawngkam an duhtui lo ber a, an duh ṭawp bawk a, insawiselna chi tin rengah an kal na ber a, MNF kawng hrang hranga min beihna hmuh tur a awm vek a ni. Kei phei chu a chhe thei ang ber, ka nih lohna thleng thlengin min bei a ni," a ti a; chutiang chu ni mah se, a dinna bial (Aizawl East-I)-ah a tlin ngei a rin thu a sawi.
MNF President chuan, an party-a Election Campaign Directorate-te'n chairman kaihhruaina hnuaiah a mamawh apianga an chetnaah te, an campaigner zawng zawngte chungahte lawmthu a sawi a, "Pathian ṭanpuinain sorkar kan siam theih ngei kan ring a, Pathianin a hun takah chuan min sawp hrep a, hun a tihah chuan min tungding ṭhin. Thil thleng reng reng kan tana ṭha turin a kaltir a ni," a ti.
Zoramthanga chuan, "Inthlanna muanawm tak, fel tak leh thianghlim thawkhat, hmun ṭhenkhatah fel lo awm bawk mah se, tluang taka kan han zo thei hi a lawmawm. Inthlanna min petu Pathian hnenah lawmthu ka sawi a ni," a ti a; inthlanna buaipuitu zawng zawng te, security duty te, MPF-te leh vote thlaktu mipui chungah lawmthu a sawi.