Hâlpuah leh silai lem khap dawn

Home minister Lalchamliana hoa nimina SAD conference hall-a sorkar hotute ṭhukhawm chuan, Krismas leh kumthar vuakvêtah hâlpuah, hâlmawi, silai lem (a mu kâp chhuak thei) leh meithallâwn (sky lantern) hâla chhuahte khap an rél. Hemi chungchangah hian DC-te chu khapna thupek chhuah tura hriattir an ni ang.

Lalchamliana chuan, Covid-19 avangin kum dang zawng aiin hâlpuah leh hâlmawi lam chi hâl loh a pawimawh thu a sawi a, "Covid-19 hian thâwkna lamah harsatna a thlen tel avangin boruak tibawlhhlawh thei hâlpuah leh hâlmawi hâl lo turin nasa lehzuala mipui zirtir a ṭul a ni," a ti.

Ṭhutkhawma an rêl danin, hâlpuah, hâlmawi leh silai lemte khap an rél a; meithallâwn chu bengchheng leh khu siam chi ni lo mah se, kângmei tichhuak thei a nih avangin kumin aṭangin khap ni se, tih a ni.

Krismas leh kumthar vuakvêtah police check post siama beihpui thlak tum a ni a, YMA-te bakah local task force-te nena thawhho dan ngaihtuah an rêl. Khap turte chu state páwn aṭanga lâk luh a nih lohna turin uluk taka lirthei endik ni se, an ti. Online-a chah luh tumte danna turin courier company-te chu phal loh thil chah an awm a nih chuan police hnenah hriattir zel tura ngen ni se, an ti bawk.