Aizawlah HIV testing drive buatsaih

Mizoram State AIDS Control Society (MSACS), AIDS Healthcare Foun­dation (AHF) leh ZONET Cable TV-te chuan vawiina World AIDS Day pualin vawiin nimin tlai khan Millennium Centre chung záwlah free concert leh HIV testing drive an buat­saih a; mi eng emaw zatin an dinhmun hre turin an thisen an enfiahtir.

World AIDS Day hman tur leh concert leh HIV testing drive huaihawt chungchangah hian nimin khan thuthar thehdarhtute an kâwm a; AHF director Dr V Sam Prasad chuan, HIV hrik a lên dan (pre­valence) tehnaah Mizoram chu 2.04% a nih thu sawiin, "India ram pumah 0.22% a ni a, Mizoram hi India ram pum aia a lêt 10 velin HIV a hluar zawk a ni," a ti.

Dr Sam Prasad chuan, HIV hrik pâite en hran loh a ngai tih sawiin, "British MP-te zingah pawh HIV positive-te an awm a, an en hrang lo. HIV veite rei tak an dam thei a, khawtlangah nuam taka an awm theih nan kan en hran loh a ngai a ni," a ti a; Mizoram mipuite chu HIV hrik paite en hrang lo turin a chah.

Dr V Sam Prasad chuan, AHF hmalaknate sawiin, mipuite'n HIV an kai leh kai loh test-na kalpui leh HIV venna atana condom sem chu an hmalakna pui berte a nih thu a sawi a, "Mipui náwlpuite thisen endik a nih theih nan hma kan la a, Mizoramah pawh bul kan ṭan dawn a, tunah hian NGO thawhpui tur kan zawng mek a ni," a ti a; hmanraw changkang, awlsam tak siin HIV test tih theih a nih thu a sawi.

Dr V Sam Prasad sawi danin, AIDS Healthcare Foundation hi kum 30 liam tawha din niin, ram 42-ah an inzár pharh tawh a, India ramah chuan kum 12 kal ta aṭanga bul ṭanin, state pakuaah hmun 29-ah hma an la mek a, Mizoramah pawh bul ṭan an tum a ni.

World AIDS Day lo thleng tur puala nimina Millennium Centre chung záwla hun an hmanah hian Mizo ṭhalai zinga mi hriat hlawh tak takte'n an thisen an enfiahtir bakah, mi dang eng emaw zatin thisen an endiktir a; condom an sem bawk.

MSACS leh AHF-te hian tukin zing dar 7 hian World AIDS Day pualin Aizawlah rally an buatsaih dawn bawk a, Chanmari kâwn aṭanga Lammual thleng kawng an zawh ang.

World AIDS Day hi Young Women's Christian Association (YWCA) leh CARE World Vision India pawhin Chanmari YMA Hall-ah chawhma dar 10.30 aṭanga an hman dawn bawk. Kumina World AIDS Day thupui chu 'Know your status' (I dinhmun hre chiang rawh) tih a ni.