Lalduhoma'n lawmthu a sawi

Zoram Peoples' Move­ment (ZPM) chuan nimin khan an pisaah chhung inkhawm an nei a, ZPM chief ministerial candidate Lalduhoma chuan, inthlanna rálmuang leh muanawm taka neih a ni chu lawmawm a tih thu sawiin, IInthlanna buaipuitu official-te in­pekna leh thawhrimna fakawm a tih thu leh, Pathian kaihhruaina vang lawmthu sawi tur an nih thu a sawi.

Lalduhoma chuan, tun ṭum inthlanah MNF-te chu opposition-ah an awm rei tawh avangin sum leh paiah harsatna nasa tak an tawh ngei a rinawm thu sawiin, "Rin ang lo takin inthlan senso leh a behbâwm atan sum an ngah hmel ta ber a, flag pawh an târ uar ber a, an lo hausa hle a ni. Heti taka sum an neih chhan hi, tute emaw iptê zen ṭâwmpui an nei a nih hmel a, 'Kan thawkho lo' ti ti mah se, inthlan result puan hnuah a takin a hriat chian theih ang," a ti.

ZPM inkhawmah hian Mizoram inthlanpuia bial hrang hranga an candidate eng emaw zatin report an pe a; ṭhahnemngai taka campaign puitu, sum leh paia ṭanpuitu leh ṭawngṭaipuitute hnenah lawmthu an sawi rualin, Pathian leh party danga mite pawi sawi leh duh loh zawng tih an nei a nih chuan ngaih­dam an dil hlawm a ni.