BJP-in sum an chelek nasa - Lal Thanhawla

Congress party president Lal Thanhawla chuan nimin khan Cong­ress Bhavan-ah thu sawiin, November 28, 2018-a Mizoram Assem­bly inthlan neih zawh takah BJP-te'n sum an chelek nasa niin a sawi.

Lal Thanhawla chuan, India ram state dangte entawn tlak inthlanna muanawm Mizoramah a awm leh thei chu lawm­awm a tih thu sawiin, "MPF-te pawhin nasa takin inthlanna felfai kan neih theih nan hma an la a, a lawmawm tak zet a ni. Heti chung hian party ṭhenkhatte'n sum an chelek nasa hle tih phat rual a ni lo. Sum leh pai chelek lamah Congress party-in sawi kan kai ve lo hi a lawmawm tak zet a, kan chak ta a nih pawhin chak dan thiam a, kan chak lo a nih pawhin puitling takin chak loh dan kan thiam mai tur a ni," a ti.

BJP-in sum an chelek nasa tih zêp rual a ni lo tih sawiin Hawla chuan, "Chak hle tura kan inngaih hi kan chak lo thei a, chutih rualin, kan beisei aia tam kan la thei bawk. Chakma ramah BJP-te'n sum an sem tam em avangin Congress candidate pakhat hi kan chán mai thei. Inthlan result a chhuah hunah BJP-te hian ṭan an la dawn a ni," a ti a; Megha­laya, Manipur leh Nagaland-ahte pawh MLA nei tam lo mah se, BJP an sorkar theih nan a thawhpui theitu chu cheng vaibelchhe tam takin an lei ṭhin thu a sawi.

Lal Thanhawla chuan, BJP pakhat tling an awm a, sorkarna an siam a nih chuan cheng vaibelchhe eng zatin nge an hausak ang tih lo chhui zui turin Mizo mipui a chah a, "Meghalaya leh Nagaland-te hi Kristian tamna ni mah se, suma lei theih an nih avangin BJP an sorkar a, kan Kristianpuite hian Mizo­ramah leh zel BJP an sorkar an hlau em em a, kohhran hruaitute pawhin BJP hlauhawmzia an sawi a ni," a ti.

MPCC President chuan, Mizorama Chief Electoral Officer (CEO) sual tak chu sual vak loin a rawn thlak a, CEO thar chuan 'Mizoram hi democracy rama inthlanna awm tawhah chuan a muanawm leh felfai ber a ni' tiin a sawi tih a sawi.