KHAWTHLIR
Chanvo sîksawi
Mizoram sorkar chuan secretary pahnih chanvo a sîksawi a; Biaktluanga chuan Higher & Technical Education department a chang dawn a, Lalthangpuia Sailo chuan General Administration department a chang ang. Heng bakah hian a hmaa an department chanpual an chang zui dawn a ni.
Cultural festival
Nimin khan Lawngtlai RMSA buatsaihin Lawngtlai Chandmary YLA Inpuiah Kala Utsav (cultural festival) buatsaih a ni a, zirlai naupangte'n India rama hnam hrang hrang lâm an entir. Kala Utsav hi Ministry of Human Resource Development hnuaia Department of School Education & Literacy-in kum 2015 aṭanga an kalpui ṭan a ni a, zirna pangngai piah lama zirlai naupangte thiam thil (talent) hai chhuahna tura duan a ni.
Rualbanlote Ni
Nimin khan Kolasib DC Dr Arun T hoin December 3, 2018-a Rualbanlote Ni (International Day of Persons with Disabilities) hman dan tur rel a ni. Kolasib DC chuan, mitdelte tana buatsaih zirlaibu 'braille textbook' sem a nih thu a sawi a, "Heng mi bikte tana zirlaibu buatsaih theih a ni hi hmasawnna chhinchhiah tlak tak a ni. Right to Education Act 2009-in zirlai ngaihsak bik ngaite pawh a huam vek a, mi bikte hi kan ngaihsak a ngai tak zet a ni," a ti. Meeting chuan, Rualbanlote Ni chu St. Joseph's Parish Hall-ah December 4, chawhma dar 11-a hman an rel.
Inthlan thlirho
ZPM Val Upa Council leh Caucus member-te chu nimin khan an pisa-ah an ṭhukhawm a, inthlan boruak an thlirhoa, eng dinhmunah pawh ding se a dawnsawn dan tur an sawiho. Val Upate chuan ZPM candidate-te'n theihtawp chhuahin, thianghlim tak sia inthlan an hmachhawn nia an hriat thu sawi chhuakin, "ZPM sorkar emaw, ZPM kaihhruai sorkar emaw a din ngei kan beisei," an ti a, ZPM candidate-te chu Pathian hming lam a, mipui hmaa rinawm tura an thu tiamte hre reng turin an chah.
Hmeichhe Ni
Nimin November 30 khan Mizoram Presbyterian-a Kohhran Hmeichhe Ni a ni a, Mizoram hmun hrang hrangah lawm a ni. Kohhran Hmeichhe Ni thupui chu "Zirtirtu ṭha - Nute' tih a ni a, Dr T Vanlaltlani, ATC ziah chu pastor bial leh kohhran hrang hrangah an zirho a; hmun ṭhenkhatah chuan ruai nen an lawm a ni.