Campaign nan sum kan nei lo - BJP President

BJP Mizoram Pradesh president Prof. JV Hluna chuan, inthlan hma aṭangin mi tam takin BJP-in sum an chelek nasa dawn a, sumin vote lei nasat an tum nia sawi ni mah se, campaign-na tur sum an nei lo tih chu an candidate-te'n an hriat chian a nih thu a sawi.

Kumin Mizoram inthlanpuia BJP candidate-te chu nimin khan an party pisaah kalkhawmin, Prof. JV Hluna'n thu a sawi a; "Hun eng emaw chen aṭang khan party hrang hrangte'n BJP hi nasa taka chirh­thehin, Zoram mipuite hi sumin an lei dawn a, lo finkhur rawh u, tiin pulpit tlang thlengin kohhran hruaitu zahawm tak takte'n Zoram mipuite warning pein, rálkhêl dár min vuaksak a. Mahse, vawiinah hian candidate zawng zawngte'n kan hriat chian em em chu, campaign-na tur sum a awm lo tih hi a ni," a ti.

Prof. JV Hluna chuan, BJP-in sumin Mizo mipui lei an tum lo nia sawiin, "Kan hnena an zawrh ber chu retheite din­chhuahna tur development hrang hrang, Zoram retheihna ata chhanchhuahna thu bak a ni lo. Nizan November 29 khan DDK-ah Prof. JV Hluna chuan seat 25 lak a inbeisei ni âwm takin thu an lo chhuah a, hei hi thu belhchian dâwl lo a ni a, kei chuan seat kan lak zat hi ka sawi thei lo," a ti a; Pathian leh mipui zarah seat eng emaw zat an lak ngei tur thu a sawi.

Mizoram BJP President chuan, Mizoram inthlanah majority seat la thei tur an awm a rinawm lo niin a sawi a, "Eng party nge kan thawhpui ang tih erawh kan hotute kutah a awm dawn a ni," a ti.

BJP candidate-te chuan thuchhuah siam­in, BJP candidate-te vote-tu zawng zawng chungah lawmthu an sawi a ni.