Citizenship (Amendment) Bill Duh lohna zirlai pawlin an lantir

North East Students’ Organisation (NESO) leh MZP chuan nimin khan Aizawla MZP pisa conference hall-ah Citizenship (Amendment) Bill, 2016 duh lohna lantirna hun an hmang. Hmarchhak state danga zirlai pawlte pawhin NESO bultumin duh lohna an lantir bawk.

MZP pisaa Citizenship (Amendment) Bill duh lohna lantirnaah hian MZP president L Ramdinliana Ren­thlei leh NESO finance secretary Ricky Lalbiakmawia ten thu an sawi a; L Ramdinliana Renthlei chuan, Citizenship (Amendment) Bill chu hmarchhak mite'n an duh lo tláng hle tih a sawi a, "India khua leh tui zawng zawng a nghawng avangin ngun zawka kan ngaihtuah a ṭul hle," a ti.

Ricky Lalbiakmawia chuan, ’Citizenship (Amendment) Bill chu a tir aṭangin

NESO-in nasa takin a dodal nghal tih sawiin, "Bill hi pass a nih chuan dan loa India rama pém lutte vangin hmarchhak state-te hi a tuar nasa ber tur kan ni tih hriain, NESO chuan sorkar laipuiah memorundum vawi hnih a thehlut tawh a ni," a ti a; Parliament winter session-ah Bill chu pass tuma ruahmanna a ni tih sawiin, kaltlangpui a nih chuan NESO-in na taka an dodal dawn thu a sawi.