Larsapin damdawi-in leh home a tlawh

Governor Kummanam Rajasekharan chuan nimin khan Durtlanga Hma­ngaihna In, Synod Hospital leh Nursing School-te a tlawh a; fahrahte leh damlote enkawl dan a en.

Hmangaihna IN leh Synod Hospital a tlawhnaah Larsap chuan, vantlang rawngbawlna kawngah kohhrante'n an thawk ṭha hle tih sawiin, "Mahni lam inngaihtuah hmasa loa mirethei, fahrah leh mi harsate enkawl hnathawhna hmun apiangte chu Pathian awmna hmun thiang­hlim a ni. Mizoramah healthcare hnuaia hmalaknate'n hmun kilkhawr ber ber a thlen phak vek theihna atana hmalak chu thil hmanhmawh thlak a ni," a ti.

Governor chuan, Synod Hospital-in kum 90 chuang tihdam rawngbawlna a kalpui thei chu chhuanawm a tih thu sawiin, an hmalaknate pawh a thlawp tlat tih a sawi a, "Damlo enkawl dam tawhte zingah inenkawl man pe thei lo tam tak ngaihdam an ni hi thil ropui tak a ni," a ti a; mi hausa leh rethei thliar lo a, a mamawhtu leh a pantu, damlote tan tihdam hna nasa leh zuala kalpui turin Synod Hospital-a thawk zawng zawngte a chah.

Integrated Child Protection Scheme (ICPS) hnuaia Synod-in a enkawl mek 'Hmangaihna In' hi kum 1984-a din a ni a; tunah chuan sorkar hmalakna ICPS hnuaiah home dangte ang bawka enkawl niin, naupang awm thei zat chu 15 a ni. Home-ah hian kum 6 hnuai lam, mipa naupang 11 leh hmeichhe naupang pali an awm a, home mother 12 leh staff pariatin an enkawl.

Synod Hospital-ah hian tun din­hmunah doctor 39, staff nurse 207, para medical staff 32 leh general staff 224 an awm a, khum 355 awmin, engtik lai pawhin khum awm zat aṭanga chhûta 80% chu luah khah reng ang a ni. Kumin chhung bikah, April thla thlenga mi harsa zawk inenkawl man pe thei lote vanga hospital account-a pawisa dawn tur, lut lo zat chu Rs. 3,37,88,317 a ni.