Inthlan chungchangah police an lawm

Mizoram Police public relations officer (PRO) chuan thuchhuah siamin, Mizoram Legislative Assembly inthlanpui tluang tak leh muanawm taka neih a ni chu lawmawm an tih thu an tarlang a; mawhphurhna nei zawng zawngte chungah lawm­thu an sawi.

Police PRO chuan, "MLA inthlanpui kan neih takah harsatna leh dan leh thupek bawh­chhiatna lian tham hriat tur awm loa rálmuang taka kan zawh theih avangin Mizoram Police chuan Mizoram mipuite chungah leh NGO te, MKHC te, media te, inthlan buaipuitute leh political party zawng zawngte chungah lawm­thu kan sawi tak meuh a ni. MPF-te thawhrimna vanga ECI kaihhruainate entawn tlaka zawm a nite hian min tilawm a, a bik taka lawmthu hrilh an phû a ni," a ti.

District hrang hrang­a SP-te leh Election official-te rim taka an thawhna zarah felfai taka in­thlanpui buatsaih a ni tih sawiin Police PRO chuan, "State dang­te pawhin an entawn tlak khawpa inthlanpui thianghlim leh muan­awm kan nei thei hi a lawmawm," an ti a; DGP Balaji Srivastava pawhin rálmuang taka dan leh thupek kenkawh a nih avangin police duty zawng zawngte chungah lawmthu sawina ziakin a siam tih a tarlang.

Police thuchhuah chuan, inthlana vite thlakna EVM-te chu a dahna strong room-ah security (CAPF, SAP, MRP)-te'n uluk taka venhim mek a ni tih sawiin, "Rálmuang tak leh boruak ṭha tak hnuaiah vote chhiar a nih theih nan te, inthlan result puan a nih hnuah pawh boruak ṭha tak kan neih zui zel nan mipui, NGO, MKHC, MPF, media, inthlan buaipuitute leh political party zawng zawngte dan leh thupek kenkawh kawngah min pui leh ṭheuh turin kan ngen a ni," a ti.