District Jail-ah legal awareness campaign

Mizoram State Legal Services Authority (MSLSA) chuan nimin khan member secretary Vanlalenmawia hoin Aizawl District Jail an tlawh a, jail dinhmun an enfiah bakah, legal awareness campaign an buatsaih.

Vanlalenmawia chuan, jail-a táng mekte'n nunphung pangngai an zawh leh ngei a duh thu a sawi a; táng mekte chu an chhuah veleh khawtlang leh kohhran bêl a, mi dangte tana ṭangkai taka nun hmang turin a chah.

Resource person Johny L Tochhawng, advocate chuan, jail chu misual hremna hmun chauh ni loin, nun siamṭhatna hmunpui a ni tih a sawi a, "Jail táng mekte'n an chungchang Court-in dik taka a rêl theih nan ukil an neih vek thei. Ukil rawihna nei lote pawhin a thlawnin ukil an nei vek thei a ni," a ti.

Tun dinhmunah Aizawl District Jail-ah mi 71 an táng mek a, mipa hlir niin, mi 23 chu thiam loh chantir tawh an ni a, mi 48 chu an thubuai ngaihtuah mek a ni.