Covid-19 vei negative tawh a thi Delhi-ah Mizo Covid-19 vei a thi

Covid-19 vei, a negative tawh tih finfiah hlim R Hrangthanga (40) s/o R Ngurchhawna, Thenzawl Vengchhak chu nimin chawhma dar 11:05 khan a thi.

Nimin vêk, chawhnu dar 3:15 khan Delhi-a Covid-19 vei Lalduhawmi (55) w/o C Lalchuangkima, ITI Veng, Aizawl chu a thi bawk.

Thenzawla Vantawng chan­chinbu editor Liantluanga Ren­thlei hnen aṭanga thu dawn danin, R Hrangthanga hi Police Training School (PTS)-a thawk a ni a, tun hnaia Bihar Assembly inthlanpuia Mizoram police duty tura kal zingah telin, PTS aṭangin mi 61 an kal a ni.

November 12, 2020 khan Mizoramah an rawn haw thleng a, Thenzawl PTS-ah khung hran nghal an ni a; an rawn thlen ní hian Rapid Antigen Test (RAT) hmangin an swab sample endik niin, R Hrangthanga leh mi dang pasarih chu Covid-19 vei an ni tih hmuh chhuah an ni. Hripui an vei tih hmuh a nih hnuah Serchhip CCC - Nursing School-ah enkawl tura lak an ni.

R Hrangthanga hi Covid-19 positive a ni tih hmuh chhuah ní aṭanga ni 20-na, November 22, Pathianni khan RAT hmangin a swab sample endik leh a ni a, a negative tawh tih finfiah a ni. Pathianni tlaiah CCC aṭangin an chhuak nghal a, PTS quarantine facility-ah ni sarih chhung inkhung leh turin an haw a ni.

R Hrangthanga hi a taksa a chak lo a, thil a ei mumal lo a, nimin chawhma dar 11:05 khan PTS-a an inkhungna hmunah a thi. A swab sample chu nimin khan TrueNAT-PCR hmanga endik leh a ni a, he thu ziah lai hian a result kan hre hman lo.

Nimin chawhnu dar 3:15 khan Delhi-a Mizoram Synod hnuaia missionary (evangelist) C Lalchuangkima nupui Lalduhawmi (55) chu Indian Spinal Injuries Centre, Delhi-ah a thi a, amah hi Covid-19 positive a ni.

Synod Mission Board secretary Rev. Zorammawia hnen aṭanga thu dawn danin, Lalduh­awmi te hi khawpui daifém, Gautampuri-ah an khawsa mek a, Covid-19 vei a nih avangin Delhi-ah vui a nih a rinawm thu a sawi. Inbiakpawhnaah harsatna a awm avangin chanchin kimchang hriat theih a nih rih loh thu a sawi bawk.

Thu dawn danin, Lalduhawmi pasal C Lalchuangkima leh an fanu pakhat pawh Covid-19 positive an ni a; an fanu erawh chu Pathianni kal taa swab test-ah a negative tawh a ni.