Khawpui fai intihsiakah endik hna ṭan

Mizorama khawpui fai intihsiaknaa endiktu tur, panel of expert-te chu nimin khan UDPA pisa atangin director H. Lianzela'n a vailiam.

Nimin khan Sairang leh Lengpui an endik nghal a, vawiinah Saiha district an pan ang. December 10, 2020 thleng an endik dawn a ni.

Panel of expert-ah hian Central YMA assistant secretary Prof. Malsawmliana, IPRO Dr. Saithantluangi Zote, Mizoram Pollution Control Board-a program officer R. Lalrinfeli NGC, MJA secretary (i/c organisation) Lal Rinmawia leh UDPA officer-te leh SBM(U) team-te an tel.

Endikna tur tehfung zingah open defecation free, open defecation plus, solid waste management leh information, education & communication te a tel dawn a; Covid-19 chungchanga hmalakna leh thil dangte a tel bawk ang.

Endiknaah hian district headquarters- Aizawl, Lunglei, Saiha, Champhai, Kolasib, Serchhip, Lawngtlai, Mamit, Saitual, Khawzawl leh Hnahthial te chu Category-I ah an awm a; census town dang zawng- Bairabi, Biate, Darlawn, Khawhai, Lengpui, Kawnpui, N. Vanlaiphai, Sairang, Thenzawl, Tlabung, Vairengte leh Zawlnuamte chu Category-II ah an awm.

Khaw 23 atang hian khawpui fai ber thlan leh a ni dawn a, result chu January 26, 2021 - Republic Day-ah puan tum a ni.