Election official-te Ajasora-ah

November 28, 2018-a Mizoram Assembly inthlana EVM leh VVPAT chiangkuan loh vanga vote thlak zawh hman lohna Tuichawng biala Ajasora khuaah chuan naktuk hian vote thlak ṭhat a ni dawn a, inthlana duty turte chuan Inrinni khan Lawngtlai chhuahsanin, nimin khan Ajasora an thleng.

Ajasora hi Lawngtlai aṭanga kilometre 150-a hlá niin, he polling station hian Ajasora-I, Ajasora-II leh Ajasora-III te a huam a; vote nei mipa 543 leh hmeichhia 537, an vaiin mi 1080 an awm. Inthlan atan hian inpeih thawkhat tawh a, December 4 zing dar 7 aṭanga tlai dar 4 in­karah vote thlak a ni ang.

Inthlan buatsaih ṭhat a ngaih avang hian Ajasora polling station chu venhimna uluk ngai zual (critical) polling station-ah puan nghal a ni a, venhimna lam pawh uluk taka ruahman a ni.

Mizoram inthlanpuiah hian Ajasora polling station-ah hian EVM leh VVPAT a chiankuan loh avanga vote thlak zawh theih a ni lo a, Election Commission of India chuan vote thlak ṭhat turin thutlukna a siam a, Lawngtlai Dis­trict Election Officer kaih­hruaina hnuai­ah inthlang ṭha turin ruahmanna siam nghal a ni.