KHAWTHLIR

Thisen pe
December 1, Inrinni khan Zuangtui Bial KṬP-in Muanna Kohhran Hall-ah bloo donation camp an huaihawt a, Aizawl Civil Hospital tan thisen unit 48 an pe a, a petute mipa 42 leh hmeichhia paruk an ni. Siaha MTP Branch-te'n Siaha District Hospital tan unit 37 an pe a, a petute mipa 27 leh hmeichhia 10 an ni a; Chawnpui Vengthlang Branch KṬP-te pawhin blood donation camp buatsaihin, an member mi 17-in Synod Hospital tan thisen an pe a ni.

Krismas puala Thisen pek
Association for Voluntary Blood Donation (AVBD) chuan December 3, Thawhṭanni aṭang hian Aizawl Civil Hospital leh Synod Hospital-a blood bank-te nen ṭanghoin blood bank pahnihah hian Krismas puala thisen pekna hun, 'Christmas Blood Donation' an buatsaih ṭan dawn a, vawiin hian hawn a ni ang. Christmas Blood Donation hi kumin December thla chhung zawng neih tur a ni a, thisen petute tan ei leh in tuihnái tak an buatsaih dawn a; Krismas puala thisen pe ṭheuh turin Mizo mipui an sáwm a ni.

Inremna ziak
Mizoram Agriculture Marketing Solution (MAMSol) leh Siliguri-a M/s Patel Ginger Company-in sawhthing lei turin Inrinni khan inremna an ziak. Inremnaah hian MAMSol aiawhin chairman T Lalmuanpuii leh M/s Patel Ginger Company aiawhin general managerRajesh Patel-in hming an ziak a, an inremna ang chuan sawhthing hi tun thla aṭanga lei ṭan tum a ni. Ruahman dan chuan MAMSol hian sawhthing chingtute tharchhuah Aizawl aṭangin an lei sak ang a, an lei khawm sa chu Mizoram pawna thawn chhuak turin M/s Patel Ginger Company hian a leichhawn sak dawn a ni.

Bûk tling lo man
Siaha-a Legal Metrology ennforcement squad chuan December 1, Inrinni zing kar khan Siaha khawpuia sumdawnna hmun hrang hrangah kal kualin, sa bûk dan an enfiah. A bûk tling loa sa hralh mi palite chu an chungchang ngaihtuah turin koh an ni a, an chungah dan anga action lak a nih tur thu an sawi. Legal Metrology mite hian Meisatla bazar, AOC bazar, Tlangkawn bazar leh Lorrain Market-te an tlawh hman a; a remchan angin chhunzawm zel an tum a ni.