LADC inthlana hman tur EVM endik

Lai Autonomous District Council (LADC) MDC inthlanpui, December 4, 2020-a neih tura hman tur electronic voting machine (EVM) 200 chu nimin khan Lawngtlai DC conference hall-ah political party hrang hrang aiawhte awm laiin engineer-te'n an endik. Inthlannaa hman tur chin chu lehkha pawtin an thliar nghal.

Lawngtlai district election officer Dr Andrew H Vanlaldika, DC chuan, EVM a ṭhat leh ṭhat loh uluk taka endik a ṭul thu sawiin, "Political party aiawhte'n a ṭha tih an pawm thlap hnuah chauh hman tlaka chhiar theih a ni. Inthlan hunah thil fel lo a awm lohna turin political party-te'n uluk takin min enpui a ngai," a ti.

LADC MDC inthlanah hian Bharat Electronics Limited (BEL) siam M2 EVM hman a ni dawn a, EVM-ah hian control unit (inthlan buaipuitute hmeh tur) leh ballot unit (vote thlaktute vote thlakna tur) a awm. Voter verifiable paper audit trail (VVPAT) erawh hman a ni dawn lo.

LADC-a MDC constituency 25-ah polling station 111 a awm a, inthlana hman tur EVM mamawh zat 111 bakah, reserve tur leh training-naa hman tur 29, a vaiin EVM 140 chu a hmanna tur constituency nen thliar nghal a ni. EVM-te chu a hmanna tur polling station chu a thawh hnihnaah thliar tur a ni ang.