Mizoramah World AIDS Day hman a ni

December 1, Inrinni kha World Health Organisation (WHO)-in khawvel huapa HIV/AIDS dona ni atana a puan, World AIDS Day a ni a, Mizo­ramah pawh hmun hrang hrangah hman niin, Aizawlah chuan hmun pahnihah hman a ni.

World AIDS Day-ah hian zing karah Mizoram State AIDS Control Society (MSACS), AIDS Healthcare Foundation (AHF) India Cares leh ZONET Cable Network Ltd.-te chuan Chanmari kâwn aṭanga Lammual thleng kawngzawh an huaihawt a, mi ṭhahnem tak an tel. Lammual sira volleyball court-ah kawngzawh tawpna hun hman a ni a, kawngzawha telte chuan HIV lakah an filhlim dawn a ni tih intiamna thu an ziak.

Kumina World AIDS Day thupui chu 'Know your status' (I dinhmun hre chiang rawh) tih a ni a; thupui ang hian Mizoramah pawh mipuite hnenah an dinhmun, HIV an kai leh kai loh an hriat theih nan thisen enfiahtir tura infuihna lam uar a ni.

World AIDS Day hi Young Women's Christian Association (YWCA) leh CARE World Vision India huaihawtin Inrinni chhun khan Chanmari YMA Hall-ah hman a ni bawk a; high school leh higher secondary school zirlaite pualin auhla (slogan), hlahril (poetry) leh lemziak (drawing)-a intihsiakna buatsaih a ni a, lawmman an sem nghal.

National AIDS Control Organization (NACO)-in India ram chhunga HIV hluar dan a tehna, Sentinel Surveillance 2016-17 ah chuan Mizorama nu nau pai thisen endik aṭanga 1.19% chuan HIV an kai tih hmuh chhuah an ni a, hei hi India ram pum dinhmun 0.28% aiin a sang hle. Mipui náwlpui (general client) zingah pawh NACO Sentinel Surveillance 2016-17 in a tarlan danin, Mizoram mipui 2.04% chu HIV kai tura ngaih (mi 100 zinga mi 2 chuang hret zelin HIV an kai tihna) a ni a, India ram pumah chuan 0.22% a ni thung. Hei vang hian Mizoram chu HIV hluar berna state a ni mek.

World AIDS Day hi kum 1988 aṭangin December 1-ah hman ṭhin a ni.