Election team-in Champhai an tlawh
Mizorama Election Commission of India (ECI) team chuan Inrinni khan additional chief electoral officer (CEO) Krishna Mohan Uppu hoin Champhai an tlawh a, electronic voting machine (EVM) strong room leh vote chhiarna tur counter centre an tlawh.
Ruahman dan chuan, Tuichang biala vote tlate chu District Panchayat Resource Centre auditorium-a chhiar tur a ni a, East Tuipui biala vote tlate chu District Panchayat Resource Centre conference hall-ah chhiar a ni ang.
Election official-te thuráwn ang leh remchan zawkna vangin Champhai North leh Champhai South biala vote tlate chu DC Badminton Hall-a chhiar tura ruahman chu thlak a ni. Lengteng biala vote tlate DC pisaa Observer Room-ah chhiar a ni ang a, Champhai North-a vote tlate chu General Establishment-ah chhiar tur niin, Champhai South-a vote tlate chu District Emergency Operating Centre-ah chhiar a ni ang.
ECI duh danin inthlan vote chhiar chhungin DC Complex-ah venhimna khauh tak siam tum a ni a, mipui náwlpui paltlang theih loh turin District Panchayat Resource Centre péngah leh DC Pisa bulahte check gate siam a ni dawn.
Ruahman dan chuan December 6, 2018-ah vote chhiar tura ruatte tan training buatsaih a ni dawn a, December 7-ah vote tla chhiar chhinna mock counting neih a ni ang.