Lallula Sailo chawimawina hlan a ni

Vanbawng khaw lal hnuhnung ber Lallula Sailo chu December 1, Inrinni khan Aizawl Ramthar Veng YMA Hall-ah chawimawina hun hman a ni a; Lallula Sailo leh a nupui bakah, a unau la dam te, a tu leh fate leh Vanbawng khaw chhuak te, tuna an awmna veng Ramthar Veng mipuite an tel.

Lallula Sailo chuan, "Mi tin mai hian kan khawtlangah damna kan neih theih nan te, kan hrisel zawk nan te, hma kan sawn theih nante kan theih ang tawkin thawk ila, kan ṭhat tlanpuiin kan zângkhai phah ang," a ti a; a hun laia sa a pelh dan chanchin a sawi bawk.

Chawimawina inkhawm hi Vanbawng Welfare Committee president Lalnunhlima'n a kai­hruai a; Lallula Sailo chu chawi­mawina thuchei hlan a nih bakah, tawlhlohpuan bahtir a ni a, thangchhuah diar khimtir a ni bawk. A nupui, Vanbawng lalnu Lalbiakveli chu vakiria khimtir a ni thung.

Lallula Sailo hi March 28, 1928-ah Vanbawngah a piang a, kum 1947-ah pastor Dawnkima fanu Lalbiakveli nen an innei. Fa panga an nei a, tu 17 leh tuchhuan 13 an nei tawh a ni. Lallula pu, Vanbawng lal hmasa Vanphunga chu kum 1922-ah Zawngin khuaah a kai a, a fapa Liankiauva chu Vanbawng lal a ni chhunzawm. Liankiauva chu kum 1947-a a thih hnuah a fapa Lallula Sailo chu Vanbawng lal a ni ta a, kum 1954-a lal bàn a nih thlengin Vanbawngah ro a rel a ni.