December 4-7 chhungin Reiekah Zofest

MZP hruaitute chuan Inrinni khan Aizawl Press Club-ah thuthar thehdarhtute an kâwm a; Zo fate insuihkhawm theihna atana khawmpui an buatsaih ṭhin Zofest 2018 chu December 4-7 chhungin Reiek khuaah an hmang dawn tih an sawi.

MZP president L Ramdinliana Renthlei chuan, Mizoram awptu­te'n Mizote duh dan ni loa ramri an kham avangin Mizote chu rorelna pakhat hnuaiah awm vek lo mah se, rilru leh thinlung lamah inpumkhat takin an awm thei tih hriain MZP-in Zofest a buatsaih ṭhin tih a sawi a, "Ramri leh khawsak phung lo dang ta vanga mahni unau, mahni chi puite ngei pawh inhre tawn tawh lote hûi khawm a, thlah khat, unau thisen inzawm kan nihzia hriattir hi Zofest tum ber a ni," a ti.

MZP President sawi danin, Zofest hi kum 2002, 2004, 2006, 2009, 2012, 2014 leh 2016-ahte buatsaih a ni tawh a, hmun hrang hranga Mizo awmte'n unau an nihzia hre tharin, Mizote inkarah Zofest hian inunauna chi nung a kui ṭiakah an ngai. Hei vang hian MZP chuan Mizo hnam péng hrang hrangte kuah khawm a, inunauna a ṭhat zual zel theih nan intawhkhawm buatsaih zel an tum a ni.

Zofest-ah hian Zofa chi peng hrang hrangte’n mahni hnamzia ṭheuh tilang thei tur zai leh lamte an entir dawn bakah, chi peng hrang hrangte incheina entir (costume parade) a ni bawk ang a, hnam peng hrang hrang aṭangin mahni hnam infiamna traditional game entir a ni ang.

Kumina Zofest-ah hian Mizoram, Tri­pura, Manipur, Assam, Arunachal Pradesh, Bangladesh leh Myanmar aṭangin palai an kal dawn tih sawiin L Ramdinliana Renthlei chuan, "Khuallian atan Myanmar aṭangin MP Ebenezer Siami (Aye Aye Mu), Bangladesh aṭangin Rangamati Hills District Council-a Cross Remliana leh Mizoram aṭangin Planning secretary Dr C Vanlalramsanga te sàwm an ni," a ti.