Synod khawmpui laia lirthei tlan dan tur

Traffic SP chuan thupek chhuahin, December 4-9 chhunga Electric Veng Presbyterian biak-ina Synod inkhawmpui neih a nih dawn avangin Electric Veng Presbyterian biak-in leh a chhehvela lirthei tlan dan tur a tarlang a, zawm ṭheuh turin mipuite a hriattir.

Lirthei tlan dan tur :

• Sakawrpului aṭanga Pres­byterian Kohhran biak-in kawmthlang Zotui Tuikhur thleng hmar lam pan chauh a tlan phal a ni ang.

• Zirtiri Residential College junction aṭanga Electric Veng -via- Bazar road chu inkhawm kal hunlai leh ban hunlai in Zirtiri College aṭang chauha tlan phal a ni ang.

• Bazar Road Pu Laldenga (L) kawt (Sakawrpuilui leh Ramthar, Chhinga Veng junction) inkar chu bus dropping zone a nih dawn avangin helai kawt hi inkhawmpui chhung chu no parking one a ni.

• Aizawl khawpui hmun hrang hrang aṭanga bus hmanga inkhawmpuina a kal turte chuan Lower Zarkawt-ah in drop in St. Mary’s pan chhukna aṭangin biak-in pan tur a ni.

• Grace Nursing Home aṭanga Bezalel dawr (Chawlhna Hotel step tawp) inkar chu dropping zone atan hman tur a nih avangin lirthei eng chi mah park phal a ni lo.

• Bazar Bungkawn atanga Electric Veng -via- New Market hi inkhawm ban lai zanlamah One Way a ni ang.

• Parking hmun a ṭhat loh avangin a theih chin chinah lirthei hmang lo thei lote pawhin dropping & pick up atan chauh lirthei keng tura ngen an ni . Loh theih loa lirthei kengte tan Chhungte International Parking lot leh YMA parking leh vengchhungin hmun ṭhenkhat park theihna tura an siam ah te a park theih ang.