BJP-in beidawngah Hawla puh
BJP chuan thuchhuah siamin, MPCC president Lal Thanhawla'n 'BJP in sum an chelek tih hi zep rual a ni loa, chak hle tur a kan inngai hi kan chak lo thei a, Chakma ramah Congress candidate pakhat hi kan chan mai thei' tih a sawi chu a beidawn vang a nih thu an tarlang.
BJP chuan MLA inthlan neih zawh takah MPF-te'n Kristian politician-te hnen aṭangin sum sem tur an man nual nia tarlangin, "An man lem loh, an sem tih hriatchian pawh tam tak a awm a ni. Chutih lai kara Hindu party ti a chirhtheh BJP hlauhawmzia an puan khum dum dumte hian sum sem tur hi pakhat mah kan nei loa, man tawk lah kan awm hek lo," a ti.
BJP tarlan danin, Lal Thanhawla'n BJP-in sum an sem nasa tih chu dawt a ni a, constituency 39-a awmte chu hriatpuitute an ni. Congress sorkar aia sum chelek nasa an awm loa, mipui chan tur hrang hrang hmanga an intuakna chu inthlanah mipui leikhawmna atan an hmang leh a ni.
'Mitin tana hmasawnna' tih bakah tlangaupui tur an nei lo nia tarlangin BJP chuan, "Mi ṭhenkhat lahin 'Development hmangin an thlem ang che u' an ti thul, Mizoram mipuite hian development nge kan duh retheihna, politics-ah hian a ni lo em ni ni development kan zawn dawn?" an ti a, kan ram leh hnam, sakhua a himna tur kawng pawimawh ber chu hmasawnna a nih thu an sawi.
BJP chuan an candidate-te'n political party, kohhran, NGO leh MPF lak aṭangin harsatna an tawh nasat thu tarlangin, "Street Corner Meeting, phalna lak thlap a neihna hmunah pawh MPF in kan candidate te an au khum a, BJP banner leh poster pawh tarte khapsak niin harsatna nasa tak kan tawk a ni. Maicham thlengin beih kan tawk," an ti.