Covid-19 donaa thawk tura inpete CMRF aṭanga ṭanpui turin ngen

Mizoram Pradesh Congress Committee (MPCC) chuan nimin khan thuchhuah siamin, Covid-19 donaa hlawh beisei loa rál hmatáwnga thawk tura inpe (volunteer)-te chu Chief Minister Relief Fund aṭangin ṭanpuina pe turin sorkar an phût.

MPCC chuan, hlawh beisei loa Covid-19 donaa inpete chu chhungkaw khawsak harsa tak taka mite an nih thu sawiin, "Mi inah te, an awmna khuaa health worker hnenahte an chêng ve mai hlawm. Mi dang tana nunna chàn huama inpe an nih angin, phunnawi hauh loin thla eng emaw zat hlawh nei loin mipui tan an thawk tawh a ni," an ti.

Congress party chuan, Mizoram mipuiin Covid-19 dona leh Covid-19 vanga harsatna tâwkte ṭanpuina atan CM Relief Fund for Covid-19-ah cheng vaibelchhe tam tak an thawh khawm tawh tih sawiin, chuta ṭang chuan Covid-19 volunteer-te lawmman tur siamsak turin Chief Minister leh CM Relief Fund hman dan réltute an ngen a ni.