Mizoram aṭanga Rajya Sabha MP thar tur K Vanlalvena
Nimin khan Assembly Secretariat-ah Mizoram Rajya Sabha MP tur thlan a ni a, MNF candidate K Vanlalvena (50), Bawngkawn, Aizawl a tling.
Rajya Sabha MP inthlanah hian zing dar 9-ah vote thlak hun hawn a ni a, ZPM Legislature Party leader Lalduhoma'n vote a thlak hmasa ber. Assembly speaker Lalrinliana Sailo-in vote a thlak hnuhnung ber a, tlai dar 4-ah vote thlak hun khàr a ni. BJP MLA Dr BD Chakma tih loh MLA dang zawng (39)-in vote an thlâk.
Election Commission of India (ECI) thu angin nimin tlai dar 5:15 khan vote chhiar ṭan a ni a; zan dar 7:30-ah Returning Officer-in K Vanlalvena chu Rajya Sabha MP atan thlan tlin a nih thu a puang.
K Vanlalvena hi MNF MLA 27-te'n an vote vek a, ZPM MLA pasarihte'n ZPM candidate B Lalchhanzova vote in, Congress MLA pangate'n an candidate Dr Lallianchhunga an vote a ni.
Mizoram Rajya Sabha MP ni lai Ronald Sapa Tlau chu July 18, 2020-ah a hun a tàwp dawn a, July 18 hmain K Vanlalvena hi MP atan lâk luh a ni ang.
K Vanlalvena chuan, an party innghahna 'Pathian leh kan ram tan' tih a nih angin Pathian leh Mizoram tan theihtawp a chhuah tur thu a sawi a, "Mizoram chhung leh páwnah pawh ni se, Pathian leh kan ram tan theihtawp ka chhuah ang tih hi ka intiam duh a ni. Ka theihtawp a tlém dawn nge dawn ka hre lo a, theihtawp erawh ka chhuah dawn," a ti.
MNF policy-ah Mizoram dinchhuahna tur a kim tâwk tih sawiin K Vanlalvena chuan, "Policy hran neih a ṭulin ka hre lo. Kan party policy-ah hian hnam thil, sakhaw thil leh development lam pawh ni se, a kim tâwk a ni," a ti a; an party policy tihhlawhtlin loa la awmte a hlawhtlin theih nan theihtawp a chhuah dawn thu a sawi a ni.
K Vanlalvena s/o K Lalzika hi January 14, 1970-ah East Lungdarah a piang a, a nupui H Lalhuapzauvi nen fapa pakhat leh fanu pahnih an nei.
RM H/S, Aizawl aṭangin HSLC a zo a, Pachhunga University College (PUC)-ah pre university (PU) leh B.Sc. a zo. College a kal lai aṭangin MZP-ah a inhmang a, kum 1995-1997 chhung MZP president a ni. Zirtirtu a ni ṭhin a, MZP president atan thlan a nih avangin zirtirtu aṭangin a báng. Mizoram UPC kohhranah kohhran upa a ni a, an kohhranah rawngbawlna chanvo pawimawh tak tak a chelh mek.
K Vanlalvena hi November 2002-ah MNF ṭhalaiah general secretary niin, a hnuah president a ni a; MNF Gen.Hqrs-ah nihna hrang hrang a chelh hnuah National Core Committee-ah member a ni mek. MNYF president a nih lai kum 2015 tàwp lama Aizawl North-III MLA by-election-ah MNF candidate a lo ni tawh bawk.