Covid19-in sumpái dinhmun a nghawng - RD Minister

Rural Development minister Lalruatkima hoin nimin khan video conferencing hmangin State Employment Guarantee Council meeting neih a ni. Minister chuan, Covid-19 hripuiin ram pumah sum leh pai dinhmun a nghawng hle tih a sawi

.

Lalruatkima chuan, Covid-19 vangin kum tharah ei leh bârah Mizoramin harsatna a tâwk dawn nia a lan thu sawiin, "Thingtlanga chêngte leh thingtlanga sum vai vir pawh nasa takin a nghawng. Ni 100 inhlawhna MGNREGS chu tun dinhmunah thingtlang mipuite innghahna ber a ni a, an dinhmun chawikangtu pawimawh tak a ni," a ti.

MGNREGS hnuaia hmalakna turah ei leh bàr thar chhuah tihpun leh chumi lama hmasawnna uar ni se a duh thu sawiin Minister chuan, "Tun hnaia state hrang hrangte hmalakna thlirhonaah Mizoram chu MGNREGS bikah state thawk ṭha berte zingah a tel," a ti. Thawktute thawhrimna leh inpekna chhuanawm a tih thu a sawi rualin, nasa leh zuala ṭan la turin a fuih.

Ṭhutkhawma an tarlan danin, kuminah hian Ministry of Rural Development aṭangin MGNREGS atan cheng nuai 51,513.40 hmuh a ni tawh a, state sorkar tum tur (matching share) chu cheng nuai 2,078.82 a ni. Kumin October thla thleng khan chawhrualin district tinah ni 74 vel inhlawhna siam a ni tawh a, November leh December thlaah ni sarih ve ve inhlawhna siam tum a ni.

Job card nei zat aṭanga chhûtin 95.14% chu ni riat chhungin an account-ah an thawh hlawh a lut ṭhin a, kumin atana hna thawh tur 19,000 aṭangin 15,000 thawh zawh tawh niin, e-FMS pawh 100% tihhlawhtlin a ni tawh. Job card neitu zinga 96.56% chu MIS-ah an Aadhaar nen thlun zawm tawh a ni.

Meeting-ah hian RD secretary Lalhmingthanga, SEGC-a tel department hrang hrang aiawh te, district hrang hranga DC-te leh DRDA project director-te leh thawktu dangte an tel.