Skywalk/ropeway thubuai chhui zel ; A siamtute Mizoramah an rawn kal

Sakawrhmuituai tlanga skywalk leh Chaltlang leh Durtlang inkara ropeway siam chungchanga MNF-te'n thubuai an thehluh chhui tura Lokayukta-in a ruat, Anti Corruption Bureau (ACB) chuan an chhui mek a, koh an nih angin a siamtu company hotute Mizoramah an rawn kal.

Vanglaini thu dawn danin, skywalk leh ropeway siam thubuaiah hian a siamtu company JV NEIP-te chu Delhi-a awm an nih avangin chhui hun chhung a duh rei a, zawh a la ni lo. JV NEIP hian tun hma chuan Aizawlah office an nei ṭhin a, mahse, tunah chuan an neih tawh lo a, Delhi-a pan emaw, Mizorama koh chhoh emaw a ngai ṭhin.

ACB mi leh sate chu thil ṭul angte chhui chiang turin ṭum hnih Delhi-a an kal hnuah, JV NEIP hotute pawh Mizoramah an ko chho a; March 15, 2022 khan JV NEIP hotute chu an ukil nen Mizoramah rawn kalin thu zawhfiah an ni. March 29 khan an ukil a rawn kal leh a, ACB lamin document an dilte a rawn keng.

Tarlan tawh angin, MNF party-a Vigilance department leh Legal Board-te chuan November 22, 2021 khan skywalk leh ropeway siamnaah thil dik lo a awm nia ngaiin Lokayukta-ah complaint an thehlut a ni.

Chhui phalna December 7, 2021 khan Mizoram sorkara Vigilance department-ah thehluh a ni a; Vigilance department chuan a zir chian hnuah December 17, 2021 khan chhui phalna a tichhuak a, ACB chuan December 22-ah an dawng. ACB-in chhui phalna an dawn hnuah hunpui a inṭan chhunzawm avangin January 2022 laihâwl velah chhui ṭan a ni.

MNF-in complaint an thehluh chu Lokayukta chuan thu tlingah ngaiin thubuai an ziak lut a, an zir chian hnuah kalpui zel dan turah thutlukna an siam. Lokayukta chuan, thubuai chu a tìrah chuan Central Bureau of Investigation (CBI) chhuitir ngei turah ngai mah se, preliminary inquiry chu ACB kutah an dah thung.