NE-a Best Panchayat Village Sialsir khua, Serchhip district

Serchhip district-a Sialsir khua chuan March 29, Thawhlehni khan Best Panchayat Village-in North East Zone lawmman pakhatna a dawng.

Lawmman hi March 29 khan New Delhi-a Vigyan Bhawan Plenary Hall-a buatsaih 3rd National Water Award-ah sem a ni a; Sialsir khuain Best Panchayat Village-in North East Zone an dawn hi President Ram Nath Kovind hnen aṭangin Serchhip bawrhsap Nazuk Kumar, PHE Serchhip district coordinator Samuel Lallawmzuala leh Sialsir VC president Vanlalrema ten an dawng a ni.

Jal Shakti Ministry chuan kum 2018 aṭang khan mimal leh páwl, tui leh tuihna humhalh leh enkawl ṭhate tan lawmman a buatsaih ṭhin a; state, district, khua leh zirna-in ti ṭhate hnenah pawh lawmman hi sem a ni. Kum 2019 khan Serchhip district-a mi tho Léng khua chuan lawmman pakhatna an lo dawng tawh bawk.

Delhi-a chám mek Governor Hari Babu Kambhampati chuan, Best Panchayat Village for North East Zone dawngtu Sialsir khua chu a lawmpui thu Twitter-ah a tarlang a, "Sialsir khaw mipui chu Mizoram mipuiin kan lawmpui a, kan chhuang hle a ni. Khaw dangte pawhin Sialsir khaw mipui hlawhtlinnah hian entawn tur ṭha tak an nei a ni," a ti.